სახელმწიფო შესყიდვების სააგენტოს მიერ გამოცხადებულ კონსოლიდირებულ ტენდერში გამარჯვების შედეგად, კომპანია “ნოვენთიქ საქართველო” პირველკლასელებსა და მათ მასწავლებლებს ASUS-ის წარმოების, ჯამში  56 000 ერთეულ, პორტაბელურ კომპიუტერს გადასცემს. 

პროგრამა, სახელწოდებით „ჩემი პირველი კომპიუტერი“, წარმატებით ფუნქციონირებს 2011 წლიდან და მისი ძირითადი ამოცანაა განათლების დონის ამაღლება და მოსწავლეთათვის ოპტიმალური სასწავლო და სამუშაო გარემოს შექმნა.

„ნოვენთიქ საქართველო“-ს მიერ პროექტის ფარგლებში შეთავაზებული ASUS-ის პორტაბელური კომპიუტერები გაუმჯობესებული ტექნიკური მახასიათებლებით გამოირჩევა. სპეციალურად განათლების სექტორისათვის შექმნილი ნეთბუქები აღჭურვილია უახლესი პროცესორითა და გაზრდილი ოპერატიული მეხსიერებით, რაც უზრუნველყოფს მოწყობილობების სწრაფ და ეფექტურ მუშაობას. აღნიშნული კომპიუტერები ასევე გამოირჩევა მტკიცე კონსტრუქციით, რაც მათ განსაკუთრებულ გამძლეობას ანიჭებს სასკოლო გარემოში გამოყენებისას. მათი ერგონომიული ეკრანი და კლავიატურა მნიშვნელოვნად გააუმჯობესებს მოსწავლეების მუშაობის პროცესს.  

ტენდერის პირობების თანახმად, კომპიუტერების მიწოდება ორ ეტაპად უნდა განხორციელებულიყო. პირველ ეტაპზე დაგეგმილი იყო 12 500 ცალი ნეთბუქის მიწოდება 2025 წლის 1 მაისამდე.

„ნოვენთიქ საქართველო“-მ პირველი ეტაპის, კერძოდ 12 500 ცალის მიწოდება 2025 წლის 14 მარტს დაიწყო და 2025 წლის 21 მარტს დაასრულა. კომპანიამ მნიშვნელოვნად გაუსწრო ტენდერის პირობებით გათვალისწინებულ ვადას, რომლის მიხედვითაც, პირველი ეტაპის სრულად დასრულება 2025 წლის 1 მაისამდე იყო განსაზღვრული.

რაც შეეხება მიწოდების მეორე ეტაპს, 43 500 ცალი ნეთბუქი სრულად გამზადებულია ტრანსპორტირებისთვის და „ნოვენთიქ საქართველო“-ს წარმომადგენლების ვარაუდით, დაგეგმილზე ადრე მოხდება მათი მიწოდებაც. 

"ჩვენთვის უაღრესად მნიშვნელოვანია ამ პროექტის წარმატებით განხორციელება, რადგან ის პირდაპირ დაკავშირებულია საქართველოს მომავალი თაობის განათლებასთან. ჩვენ გულწრფელად გვჯერა, რომ თანამედროვე ტექნოლოგიებით აღჭურვილი სასწავლო გარემო გადამწყვეტია მოსწავლეების განვითარებისთვის. ამიტომ, ტენდერში უახლესი თაობის ASUS-ის პორტაბელური კომპიუტერები შევთავაზეთ. ჩვენი კომპანიის მიერ შეთავაზებულმა კონკურენტულმა ფასმა ხელი შეუწყო პროექტის ბიუჯეტის მნიშვნელოვან ოპტიმიზაციას. ჩვენთვის მნიშვნელოვანია, რომ პირველი ეტაპის მიწოდება დაგეგმილზე მნიშვნელოვნად ადრე დავასრულეთ, რაც ჩვენი გუნდისა და პარტნიორების ეფექტური, გუნდური მუშაობის შედეგია. “ნოვენთიქ საქართველო”-ს მიზანია, მომავალშიც აქტიურად ჩავერთოთ მსგავს პროექტებში, ჩვენი წვლილი შევიტანოთ და ხელი შევუწყოთ ჩვენი ქვეყნის განათლების სისტემის განვითარებას. 
მსურს გამოვხატო ღრმა მადლიერება განათლების მართვის საინფორმაციო სისტემის ხელმძღვანელის დიმიტრი ბერიძისა და მისი გუნდის (დავით ტატიშვილი, ლევან ბიძინაშვილი) მიმართ. რამდენიმე თვის განმავლობაში, მათი პროფესიული მხარდაჭერა და ტექნიკური კონსულტაციები გადამწყვეტი იყო ASUS-ის წარმომადგენლებთან მოლაპარაკებებში, რაც უზრუნველყოფდა პროექტის ფარგლებში უახლესი თაობის პორტაბელური კომპიუტერების შერჩევას. 
ასევე მადლობა მინდა გადავუხადო სსიპ „საგანმანათლებლო და სამეცნიერო ინფრასტრუქტურის სააგენტოს“, პროექტის ხელმძღვანელს ნინო სოზიაშვილს და მთელ გუნდს ოპერატიული და კონსტრუქციული პარტნიორობისთვის“, განაცხადა კომპანია “ნოვენთიქ საქართველო”-ს დირექტორმა, რევაზ ურუშაძემ.